കൈകൊണ്ട് ചിത്രം വരയ്ക്കാൻ തന്നെ എത്ര ബുദ്ധിമുട്ടാണ് എന്നറിയാം. കഴിവ് മാത്രമല്ല നല്ല ശ്രദ്ധയും ക്ഷമയും ഒക്കെ വേണം. അപ്പോൾ മൂക്കുകൊണ്ട് ചിത്രം വരച്ചാലോ. അങ്ങനെ ഒരു കൂട്ടം ആളുകളെ കാണണമെങ്കിൽ കൊല്ലം ജില്ലയിലെ കരുനാഗപ്പള്ളിയിൽ എത്തണം. കരുനാഗപ്പള്ളി വർണ്ണം ചിത്രകല അക്കാദമിയിലാണ് ഈ വേറിട്ട കാഴ്ച.
വർണ്ണം അനി എന്ന ചിത്രകലാ അധ്യാപകനാണ് ഈ സ്ഥാപനം നടത്തുന്നത്.
കൈകൊണ്ടു മാത്രമല്ല കാൽകൊണ്ടും നാവുകൊണ്ടും മൂക്കുകൊണ്ടും ഒക്കെ ചിത്രം വരച്ച് മുമ്പേ പ്രശസ്തനാണ് അനി വർണ്ണം. ഓടുന്ന ബൈക്കിൽ ഇരുന്നു പോലും പുള്ളിക്കാരൻ ചിത്രം വരച്ചിട്ടുണ്ട്. നാവുകൊണ്ടുള്ള അനിയുടെ ചിത്രരചന കൊറിയൻ ഡോക്യുമെൻററിക്ക് പ്രമേയം ആയിരുന്നു. പിന്നീട് ബിബിസി അടക്കമുള്ള ലോകമാധ്യമങ്ങളും കരുനാഗപ്പള്ളിയിൽ അനിയെ തേടിയെത്തി.
പ്രശസ്തി ആഗ്രഹിച്ച് തന്നെയാണ് വേറിട്ട വഴി തെരഞ്ഞെടുത്തത് എന്ന് അനി വർണം തുറന്നു പറയുന്നു. എന്നാൽ നാട്ടിൽ വേണ്ടത്ര അംഗീകാരം ഇന്നും ലഭിക്കുന്നില്ല.
പലർക്കും പരിഹസിക്കാൻ ആണ് താല്പര്യം. എന്നാൽ തന്റെ വഴിയിലൂടെ തന്നെ മുന്നോട്ടു പോവുകയാണ് ഈ ചെറുപ്പക്കാരൻ. ഒപ്പം ഭാര്യയും ഒരുപറ്റം ശിഷ്യരും ഉണ്ട്.
ലഹരി വിരുദ്ധ സന്ദേശം പകരാനായി അനിയുടെ ശിഷ്യർ മൂക്ക് കൊണ്ട് വരച്ച ചിത്രം ഏറെ ശ്രദ്ധ പിടിച്ചു പറ്റി. നാല് മണിക്കൂർ സമയമെടുത്താണ് 24 ഓളം കുട്ടികൾ ചേർന്ന് ചിത്രം വരച്ചത്. വളരെ മനോഹരമായ ചിത്രം. ഇനി ഗിന്നസ് ബുക്കിൽ കയറിപ്പറ്റുകയാണ് ലക്ഷ്യമെന്ന് ഇവർ പറയുന്നു.
അവാർഡുകൾക്കും പുരസ്കാരങ്ങൾക്കും ഒന്നും പിന്നാലെ പോകുന്ന ആളല്ല ഈ ചിത്രകാരൻ. ഏതെങ്കിലും രാഷ്ട്രീയ പാർട്ടിയെ താങ്ങി നടന്നാൽ മാത്രമേ അതൊക്കെ കിട്ടുയെന്ന് അനി വർണ്ണം പറയുന്നു. അതിന് താല്പര്യമില്ലാത്തതിനാൽ തന്നെ അങ്ങനെ ശ്രമിച്ചിട്ടില്ല. എന്നാൽ അർഹതയ്ക്ക് അംഗീകാരമായി നിരവധി പുരസ്കാരങ്ങൾ ഇതിനോടകം ഇവരെ തേടിയെത്തിയിട്ടുണ്ട്. എന്തായാലും ഈ വേറിട്ട ചിത്രകാരനും ശിഷ്യരും വേറിട്ട ചിത്രകലാ വഴിയിലൂടെ മുന്നോട്ടു പോവുകയാണ്. സൂക്ഷിക്കുക, വേണ്ടിവന്നാൽ അവർ മൂക്കുകൊണ്ട് ക്ഷ, ണ്ണ വരപ്പിച്ചു കളയും.
വീഡിയോ കാണാനായി ലിങ്കിൽ ക്ലിക്ക് ചെയ്യൂ
